Hütte händ mir zämme T-shirts gfärbt. Zerst händ mir natürlich müesse abstimme, welli Farb mir näme. D Mehrheit isch für Türkis-Dunkelblau gsi.
Mir händ uns denn im Jugi troffe und d T-Shirts abbunde. Tatyana het uns zum Glück au öppe 3 Mol erklärt, dass me d Schnüer fest muess azieh. Will nur denn blibt dä Teil würklich wiss. Wo mir fertig gsi sind mit abbinde sind mir zerst go Znacht ässe. Es het mit Mozzarella oder Salami ufpimti Pizza gäh.
Satt gässe, sind mir denn use gange, wo das Ganze statt gfunde het. Dört sind den scho drei grossi Chessel gstande. Usserdäm händ mir no drei grossi Stöck brucht. Wo d Tatyana denne alli „Chemikalie“ ihne gmacht het, han ich mich gfühlt wie de Zauberlehrling! (Hat der alte Malermeister, sich doch einmal weg begeben, so sollen seine Farben auch nach meinen Lüsten leben… oder so ). Zerscht händ mir mit emene tolle türkis, wo sich spöter als hellblau use gstellt het, gfärbt. Nach ere halb Stund vo rühere und bewundere, händ mir s use gno, usgwäsche (s Wasser isch extrem heiss gsi aber egal), schomol d Farb bewundered und denn, neu Abbunde. Die dunkelblaui Farb han ich denn no viel schöner gfunde als die ersti. Obwohls zerst extrem dunkel usgseh hed. Aber wo mir s usegno hän, isch es wunderschön gsi !!! Nachdäm mir s nomol usgwäsche hän isch de grösti Kampf vo mim Läbe cho: „Mir Girls gegen die Schnüer !!!“ .
Aber wo mir denn ganz knapp fertig worde sind (mir hän öppe e Halbbstund überzoge ), und ich de Kampf mit „DE SCHNÜR“ nur knapp überläbt han, sind wunderschöni Resultat use cho. Mir händ jetzt alli e mega tolls Gruppe T-Shirt wo uns ganz lang an die schöni Zit zämme erinnere wird.
Sara Steiger